RSS icon Bullet (black)
  • “MARTUTENE”, Euskadi Literatura saria

    Posted on 4 azaroa, 2013 No comments

    Ramon Saizarbitoriak  2013ko Euskadi literatura saria jaso du, Martutene lanagatik, euskarazko literatura modalitatean. Ramiro Pinillak, aldiz, gaztelaniazko literatura saria, eta Elena Odriozolak, literatura lanaren ilustrazioarena. Itzulpengintza alorreko saria, berriz, Iñaki Mendiguren eta Sarah J. Turtle bikoteak irabazi du, Tom Sawyer-en abenturak lanagatik.

    Epaimahaiak Ramon Saizarbitoriaren Martutene lana goraipatu du, haren eleberri onena eta intimoena delakoan eta haien ustez, Euskal literaturaren lan klabea delako. Afektibotasuna, gizartea eta literatura dira, haien arabera, lan handi honen hiru ardatzak. Martutene eleberriak, Ramon Saizarbitoria idazleak 2012 urtean plazaratu zuen euskarazko eleberri luzea da, bi bikoteen baitako harremanak kontatzen dituena, atzerritar neska gazte bat tarteko. Bikote-harremanak kontatzeaz gainera, beste hainbat arlo jorratzen dituen eleberria da: idazlearen lana, medikuntza eta osasungintza eta Euskal Herriko gatazka besteak beste. Donostian girotuta dago, Martin eta beste zenbait pertsonaia Martutene auzoko villa batean kokaturik. Martutene eleberrian  Max Frischen Montauk eleberria erreferentzia nagusia da: atzerritar neskaren izena Lynn da, Frischen liburuko pertsonaia nagusia bezalaxe eta Montauk liburua bera Martutene eleberriaren hari nagusietako bat dela esan daiteke. Bederatzi urtez lanean eman zituen Ramon Saizarbitoriak eleberria osatzen,  Kandinskyren tradizioa 2003 urtean plazaratu ondoren eta egundaino idatzi duen lan luzeena da.

    Ramiro Pinilla, Aquella edad inolvidable eleberriagatik saritu dute. Epaimahaiak  “Gaztaroa, fideltasuna, arrakasta eta porrota ardatz dituen eleberri zoragarria” bezala definitu dute . Gainera, lanaren “elementu autobiografikoak” goraipatu dituzte eta Pinillaren lanik “hunkigarriena” dela azaldu dute.

    Pinillak zein Saizarbitoriak Eusko Jaurlaritzak ematen dituen sarietako palmaresean errepikatu dute. Pinillak 2005ean jaso zuen Verdes valles, colinas rojas lan entzutetsuagatik, eta Saizarbitoriak 2001ean eskuratu zuen, Gorde nazazu lurpean eleberriagatik.

    Epaimahaiaren ustez, Tom Sawyer-en abenturak lanari dagokionez, euskal itzulpengintzak gaur egun lortu duen mailaren adibide egoki-egokia da. Gainera, Mendigurenek eta Turtlek sortzen duten “tandema” goraipatu dute.

    Elena Odriozolaren kasuan (literatura lanaren ilustrazioa), haren teknika berritzailea saritu dute: elkarren gainean jarritako paper moztuen teknikari esker, argi-itzal sotilez betetako istorio bat kontatzen du Elena Odriozolak, baina, aldi berean, “kontakizun intimista eta pertsonal honetan barneratzen uzten diguten kolore ere badira argi-itzalok”, azaldu dute.

    Leave a reply